U3F1ZWV6ZTM3ODUyNzk3NjgwX0FjdGl2YXRpb240Mjg4MTk5NzIxMDI=

خطوات تأسيس شركة جزائرية خطوة بخطوة - الجزء الثاني



بعدما عرفنا أنواع الشركات اليوم الخطوات باش نأسس شركة خطوة بخطوة

و هنا تبدا الجريات مع الإدارات الجزائرية

ملاحظة: انت في كل خطوة لازم تسقسي و تتأكد


تأسيس شركة بالجزائر خطوات تأسيس شركة بالجزائر تأسيس شركة صغيرة بالجزائر تأسيس شركة في الجزائر

  • الخطوة الاولى : قبل ما تبدا تجري على الاوراق 

اجلس انت و شريكك و ديرو قهوة و اتفاهمو على كل الامور ...راس المال كيفاه ... نسبة كل واحد قداه ...شكون المسير ... و غيرها كل شيئ تتافقوا عليه
  • الخطوة الثانية : التسمية

اول حاجة في الاوراق تروح لمركز السجل التجاري في ولايتك باش دير تسمية الشركة ... كاين ورقة تعمرها تقدر تجبدها من موقع الالكتروني سجلكم ... تكتب اسم الشركة و تكتب 5 اسماء باختيارات مختلفة ... باش اذا لقاو اسم الاول محجوز يفوتو للثاني و هكذا .... تسلك 90 الف تبالي و تدفع الورقة .... كي تخرج ورقة تسمية الشركة تبقى سارية المفعول 6 اشهر كشغل راك حجزت الاسم 6 اشهر لوكان مديرش شركة و متستغلوش في 6 اشهر يلغى ... و هذيك الورقة قبل ما تدفعها تحط العنوان وين رايح تكون الشركة تقدر تحط عنوانك المنزلي من بعد تبدلو بصح تزيد الجريات برك
  • الخطوة الثالثة : عقد الايجار

هنا اذا كنت راح تكري لازم عقد الايجار من عند النوتار تاع المقر سواء محل او دار ...... في المقر هذي كاين من 4 الى 5 اختيارات
1 كراء محل او منزل
2 ملكية تاعك مثلا عندك قاراج باسمك
3 مساحات العمل المشتركة تقدر تكري فيها مكتب
4 حاضنات المشاريع اذا قبلو مثلا مشروعك يقدرو هوما يديرلوك مكان لاقامة شركتك
5 كاين القرار الاخير تاع بعض المشاريع لي متحتاجش مقر ( معنديش معلومات كيفاه يطبقوها)
  • الخطوة الرابعة : اللقاء التأسيسي ( منعرف هكذا اسمها )

هذي دير كشغل ورقة تكتبوا فيها انت و شريكك بلي في يوم فلاني قررنا فلان و فلان انشاء شركة اسمها كذا ذات المسؤولية المحدودة و رأس مالها كذا و تعمل في مجال الفلاني ......... هذي تلقاوها عند النوتار متعمرش راسك بيها بزاف
  • الخطوة الخامسة : قوانين الشركة

دائما عند النوتار تجي مرحلة ديرو قوانين تاع الشركة تاعكم فيها كل القوانين فيها شكون المسير او المسيرين كل واحد و الحصة تاعو قداه 50/50 او غيرها قداه رأس مال لي يدخل بيه كل واحد ...... تقدرو تزيدو قوانين باش يكون التسيير ساهل و متكونش مشاكل
  • الخطوة السادسة : وضع رأس المال

هنا يطلب منك النوتار ( من مسير الشركة ) يوضع رأس المال في حسابه في الخزينة العمومية ... هنا تقدر تحط نصف رأس المال و النص الباقي تحطو في غضون سنة يعني كشركة معنوية الحد الادنى لرأس المال 10 ملاين تقدر تحط 5 و الباقي في عام تحطو
  • الخطوة السابعة : اشهار الشركة

هذي خطوة يقوم بيها النوتار ثاني و يقوم باشهار الشركة و كل كود في الشركة تاعكم تخصلو عليه تبالي 300 دج للاشهار اذا مانيش غالط
  • الخطوة الثامنة : السجل التجاري

هنا تهز هذوك الاوراق كامل ( تقدر تشوف موضوع البارح) و تهز استمارة تعمرها تحط فيها لي كود لي حاب تخدمهم الشركة و اذا كان اعتماد باينة ثاني فيها الرخصة و 400 الف طابع جبائي و راح يعطوك ورقة تخلص حق لي كود تاعك
و من بعد يخرج السجل التجاري تاع الشركة
  • الخطوة التاسعة : الكاسنوس

كي يخرج السجل التجاري تاعك اول حاجة ديرها تروح لكاسنوس عندك 10 ايام ديكلاري بالسجل التجاري انت و اذا عندك شريك ثاني ... في حال فاتت 10 ايام قادر يديرولكم مخالفة .... الكاسنوس خاصة بالافراد تسمى تسوري روحك انت
متنساش دير الكاشي تخدمو
  • الخطوة العاشرة : الضرائب

تروح ديكلاري الشركة تاعك في مصلحة الضرائب ... بعدها تخرجلك ورقة تبين وجود الشركة و فيها واحد الكود من بعد تدخل للسيت تاع النيف و تعمر المعلومات
(انت دائما كل حاجة تسقسي ويقولك الملف يعني واش تجيب )
  • الخطوة الحادي عشر : النيس

هي تابعة للديوان الوطني للاحصاء تسقسي وين جاية لي تابعين ليها انت و تدي هذاك الملف كي العادة كامل و يعطوك واحد الورقة فيها الكود تاع الشركة تاعكم
هنا تقدر تعاود الكاشي تاعك بكل المعلومات و تقدر الكاشي يكون فيه الحد الادنى للمعلومات
  • الخطوة الثانية عشر : فتح حساب بنكي للشركة

هنا متنساش نورمالمو راك رجعلت للنوتار و اعطاك الشاك تاع راس المال باسم الشركة تاعكم و تزيد تدي كل الاوراق لي تطلبهم البنك باش تفتح حساب بنكي للشركة .... و تتحصل على رقم الحساب البنكي للشركة ... بانية تطلب الشاك .... بطاقة البنكية ....
----------
هنا مبروك عليك عندكم الان شركة

الاسمبريد إلكترونيرسالة